بيرم يلقي الضوء على مساوئ الماضي

في القصيدة التالية يوضح بيرم ماكان يعانيه الناس من الاستغلال والغش
وعدم الالتزام بالاعراف ولا القوانين وحتى التلوث في الطعام والشراب
القصيدة بعنوان الغش والغلا
***
الأكل و الشرب فى إيد اللومنجية

و الطماعين اللى غلوا الملح و الميه

و الغشاشين اللى فاقوا على الحرامية

الشاى بالمفتشر مخلوط ملوخية

والبن فيه الشعير تسعين فى الميه

و الميه و العيش برمله و طينه يا ملوخليه

و اللحم معروض بدون أختام رسمية

و الميه هيه اللبن و لا اللبن هيه

أفاعى متسيبه من غير رفاعيه

و دنيا مترتبه ترتيب فلاتيه

ـــــــــــــــــــــــــــــــــــ
القصيدة التالية عن الواسطة والمحسوبية
وهي بعنوان الواسطه لسه شغاله

الواسطه لسه شغاله يا رجالة ** والحاله هياها الحاله في كل مكان
لفندي قال والاسطي هيه الواسطه ** في كل مركز ومحطه خاتم سليمان
تشغلك وانت فراش كاتب بمعاش ** وتدخلك السيما ببلاش ويا الاخوان
ايه اللي خلي الملعونه تصبح فينا ** شريعه فوق شرع نبينا شرع القرآن
طماع و عايز فوق حقه واسطه تزقه ** لرئيس عمل فاتح بقه زى التعبان
والحق بين الاتنين ضايع وهو داالشايع ** مدير بيبلطج علي صايع عاطل كسلان
ومدير شريف حيرته حيره وحوسته كبيره ** في مطلب الست منيره وخليل شعبان
يعفي ابنهم من الجهاديه والبلديه ** يجيب مخالفتها عليه وعلي الجيران
داء في الكنانه متمكن او متوطن ** وجرح ضارب ومعفن زى السرطان

ــــــــــــــــــ